హనీమూన్‌కు ఫ్యామిలీని తీసుకెళ్లిన భర్త.. విడాకులకు దరఖాస్తు చేసిన భార్య!

పెళ్లయిన కొత్తలో నూతన వధూవరులు ఒకరినొకరు అర్థం చేసుకునేందుకు, ఏకాంతంగా గడిపేందుకు హనీమూన్ ప్లాన్ చేసుకుంటారు. కానీ ఉత్తరప్రదేశ్‌లోని మీరట్‌కు చెందిన ఒక వరుడు చేసిన పని, వారి సంసారంలో పెను తుపాను రేపింది. హనీమూన్ ట్రిప్ కాస్తా ఫ్యామిలీ పిక్నిక్‌గా మారడంతో తీవ్ర మనస్తాపానికి గురైన భార్య, భర్త నుంచి విడాకులు కావాలంటూ ఫ్యామిలీ కోర్టును ఆశ్రయించింది.

మ్యాట్రిమోనియల్ వెబ్‌సైట్ ద్వారా మీరట్‌కు చెందిన దివ్య, ఢిల్లీలో నివసించే శివమ్ కుమార్‌లకు పెద్దలు పెళ్లి కుదిర్చారు. సింగపూర్‌లో హాస్పిటాలిటీ మేనేజ్‌మెంట్ చదివిన శివమ్.. పెళ్లయిన తర్వాత భార్యతో కలిసి దుబాయ్‌కి హనీమూన్ ప్లాన్ చేశాడు. అయితే ఇక్కడే అసలు ట్విస్ట్ ఇచ్చాడు. భార్యతో పాటు తన తల్లిదండ్రులు, సోదరి, సోదరుడిని కూడా అదే ట్రిప్‌కు తీసుకెళ్లాడు. వివాహం తర్వాత భర్తతో ప్రైవేట్ సమయాన్ని గడపాలని ఆశించిన దివ్యకు అత్తమామల ఉనికి తీవ్ర అసంతృప్తిని కలిగించింది. హనీమూన్ అనేది దంపతుల వ్యక్తిగత విషయమని, కుటుంబ సభ్యులతో కలిసి వెళ్తే ఆ ప్రయాణ ఉద్దేశమే దెబ్బతింటుందని ఆమె వాదించింది. మరోవైపు తన కుటుంబ సభ్యులను సంతోష పెట్టడానికే తీసుకెళ్లానని, అందులో తప్పేమీ లేదని భర్త వాదించాడు.

ఈ గొడవ కాస్తా మీరట్ పోలీస్ లైన్స్ ఫ్యామిలీ కౌన్సెలింగ్ సెంటర్‌కు చేరింది. భార్యాభర్తల మధ్య సయోధ్య కుదిర్చేందుకు కౌన్సెలర్లు ఇప్పటికే మూడు రౌండ్ల చర్చలు జరిపినప్పటికీ ఇరుపక్షాలూ తమ పంతాన్ని వీడలేదు. ఇద్దరూ విడిపోవడానికే మొగ్గు చూపుతుండటంతో కౌన్సెలర్లు త్వరలోనే నాలుగో సెషన్‌ను నిర్వహించనున్నారు. విద్యావంతులైన యువత వ్యక్తిగత స్వేచ్ఛ, ప్రైవసీని కోరుకుంటుండగా, సంప్రదాయ ఉమ్మడి కుటుంబాల ఆలోచనా విధానం వీటికి భిన్నంగా ఉండటమే ఇటువంటి విచిత్ర వివాదాలకు కారణమవుతోందని సామాజిక నిపుణులు అభిప్రాయపడుతున్నారు.